নাৰায়ণ, কাহে ভকতি কৰোঁ তেৰা

ৰাগ - ধনশ্ৰী

ধ্ৰুং ।। নাৰায়ণ, কাহে ভকতি কৰোঁ তেৰা।
          মেৰি পামৰ মন, মাধৱ ঘন ঘন, ঘাতুক পাপ নাছোৰা।।

পদ ।। যত জীৱ জঙ্গম                     কীট পতঙ্গম
                        অগ নগ জগ তেৰি কায়া।
           সবকহু মাৰি                        পূৰত ওহি উদৰ
                        নাহি কৰত ভূতদায়া।।

           ঈশ স্বৰূপে হৰি                    সব ঘটে বৈঠহ
                        যৈচন গগণ বিয়াপি।
           নিন্দা বাদ                             পৈশূন্য হিংসা হেৰি
                        তাঁহে কৰোহোঁ হামু পাপী।।

           কাকু শঙ্কৰ কয়                     কৰহু কৰুণা নাথ
                         যোনো চাড়োহোঁ ৰাম বাণী।
           সব অপৰাধক                      বাধক তুৱা নাম
                          তাহে শৰণ লেহোঁ জানি।।