কেমনে পাইবো হৰি চৰণ তোৰে

ৰাগ - তুৰ-ভাটিয়ালী

ধ্ৰুং ।। কেমনে পাইবোঁ হৰি চৰণ তোৰে।
          এ দুঃখ সাগৰে উদ্ধাৰ মোৰে।।

পদ ।। এ ভৱ আটোপ অৰণ্য মাজে।
           কালব্যাধে মৃগ মাৰিতে সাজে।।

           হামু পশু মায়া-জালত বন্দী।
           নাহি দেখোঁ হামু পলাইতে সন্ধি।।

           কাম ক্ৰোধ কুত্তা কামুৰি খাই।
           বিষয় বিষ লাগি এজীৱ যাই।।

           ৰূপ ৰস আদি এ পঞ্চ বাণে। 
           হৃদয় মাজে হামু ফুটলো টানে।।

           পাপ-পুণ্য ভৈল এ বৰ ডোৰে।
           গলাৰ মাজে ছান্দি বান্ধিল মোৰে।।

           কাল ব্যাধে ধৰি লৈ যায় টানি।
           ৰাখো ৰাখো মোৰে শাৰঙ্গ-পাণি।।

           কালৰোকাল তুমি চাহেব হৰি।
           নাহি নাহি আৰ তোমাত সৰি।।

           জানিয়া শৰণ লৈলোঁ তোমাৰ পায়।
           দীন মাধৱ দাসে এ ৰস গায়।।