ৰাজতু-নন্দ-ৰাজকু নন্দন

ৰাগ: মাহুৰ ধনশ্ৰী

ধ্ৰুং।। ৰাজতু-নন্দ-ৰাজকু নন্দন।
          যাকেৰি চৰণ ৰেণু জগ বন্দন।।

পদ।। শুদ্ধ পৰম ব্ৰহ্ম গোপ-কুমাৰা।
          ত্ৰিভুৱন-তাৰণ হেতু অৱতাৰা।।

          কাৰ্ত্তিক ময়ুৰ পুৰ্চ্ছ শোভে শিৰে।
          মণি-গিৰি-গৈৰিক ৰঞ্জে শৰীৰে।।

          কুন্তল কুটিল অলক-ৰাজি মণ্ডন।
          নখমণি চন্দ্ৰ তাপ-তিনি-খণ্ডন।।

          নবীন গুঞ্জামণি হাৰ বিৰাজিত।
          স্তৱক-ৰাজ দুহো শ্ৰৱণে বিভূষিত।।

          নানা ৰতন জড়িত অঙ্গ-ভূষণ।
          লাৱণ্য-ধাম শ্যাম তনু শোভন।

          মুকুতি-বিড়ম্বন লীলা যাঁহাৰু।
          মাধৱ কহ গতি নন্দ কুমাৰু।।